高雄地產商 - 興富發建設

如果京城集團係高雄數一數二嘅建築商,興富發建設應該算係老二，都係一間成立咗超過30年嘅發展商,係高雄嘅樓遍布每一個角落,而亦因為時代嘅發展,同埋客戶嘅需求,由平平實實嘅大樓,到到而家嘅豪宅,興富發建設都有起，論質量,論價錢,都同京城集團拍住上，兩間公司都係高雄有好多地,好多大樓,好多新發展嘅豪宅建案，而亦都因為歷史有番咁上下,起啲樓嘅質素都算有保證。

興富發建設同香港嘅長江實業,新鴻基地產都好似,不過亦都有啲似香港嘅嘉里建設，逐漸豪宅化,平平實實嘅大樓就越起越少，總體嘅平均價錢都比較上高,平樓就無佢份啦,當然啦,地就係得咁多,起高啲,起得似豪宅啲,賣貴啲,有咩唔好呢。老實講，亦都係因為而家啲發展商只係記住起豪宅,搞到D相上車嘅年青人,一係就買遠啲,一係就買啲新新淨淨嘅 二手樓，搞到啲二手樓嘅價錢高晒，不過無法子啦,大環境係咁樣,大家都要睇餸食飯,情況同香港嘅地產市道差不多。

如果大家鍾意香港長江實業，同埋新鴻基之類起嘅樓，高雄興富發建設嘅樓應該都有保證,當然,如果想買一啲平實啲嘅新樓,興富發建設就唔係咁適合,京城集團起嘅樓比較上平實一啲，選擇亦都比較上多。

其他建議連接：

• 搞清楚實用面積、建築面積、公設、公設比
• 臺灣用”坪“，香港用”呎“，大陸用”平米“
• 臺灣住宅房地產種類
• 高雄區域介紹 - 前言
• 高雄地產商 - 前言

高雄地產商 - 京城集團

京城集團係高雄數一數二嘅建築商,佢哋嘅樓遍布高雄每一個角落,大概三十幾年前起家，由起一啲十零20層高，樸樸實實嘅大樓, 到到而家又起豪宅，由起啲大眾化嘅社區，真係起乜都有佢份，無法啦,以前買埋咁多地,真係中意起乜都得,如果你話香港有地產霸權,成日都係個幾個發展商霸晒啲地,京城集團就算係一間實實在在,慢慢成長同發展嘅建築商,所以起啲樓嘅質素 都算有保證。

高雄嘅京城集團有啲似香港嘅長江實業同埋新鴻基地產嘅混合體, 有起豪宅，又會起啲平實嘅社區,好似黃埔花園,麗港城之類，選擇非常之多,而亦都因為佢有品牌效應,通常啲樓都比較上保值,意思即係話就算個市唔好,都有一批忠實捧場客,買賣同租賃嘅市場都唔錯，市場長期都有一定嘅流通量,自住同投資都唔錯。

其他建議連接：

• 搞清楚實用面積、建築面積、公設、公設比
• 臺灣用”坪“，香港用”呎“，大陸用”平米“
• 臺灣住宅房地產種類
• 高雄區域介紹 - 前言
• 高雄地產商 - 前言

香港留學生黃詠賢魂斷高雄 - 節哀順變

啱啱睇到一則新聞,一個響台灣高雄留學嘅香港大學生黃詠賢，琴晚揸車經過火車軌嘅時候發生意外,比來緊嘅火車撞死,非常可悲，希望佢家人節哀順變。

老實講,我響中港台三地都有車牌,駕駛年資超過15年,比較咁多地方,中國最亂應該無人會有異議，香港揸車規矩多多,所以亦都感覺上比較安全,台灣因為有綿羊仔左穿右插,揸車嘅真係要醒目啲,不過話又說回來,響邊度揸車都要提高警覺,保障自己同乘客的安全。

响高雄發生意外嘅地點,就正正係鼓山區美術館 旁邊嘅火車軌路口，一日廿四小時都有人駐守,保證行車安全,亦都因為高雄而家起緊一條係地底嘅鐵路,將會全面取代地面嘅火車軌,再過兩年,地面就唔會有火車行來行去,保障市民嘅安全,到時呢啲火車撞車嘅交通意外就唔會再發生,當然火車軌附近嘅樓價亦都會因應上升，因為原有嘅火車軌將會變為綠化帶 ，種花種樹種草起公園 等等，如果有興趣投資高雄火車軌附近嘅住宅，可以搵一啲比較上破舊嘅物業，自己重新翻身，都幾有潛質。

其他建議連接：

• 搞清楚實用面積、建築面積、公設、公設比
• 臺灣用”坪“，香港用”呎“，大陸用”平米“
• 臺灣住宅房地產種類
• 高雄區域介紹 - 前言
• 高雄地產商 - 前言
• 驅車闖台鐵路軌 遭推行200米 火車攔腰狂撼　港女慘死

高雄地產商 - 前言

有好多人問我响高雄或者台灣有啲咩發展商,建築商比較上靠得住,又話要問下啲建築材料好唔好,又驚啲樓會漏水,以後要處理都非常麻煩,當然啦,遠洋過海投資,搵着間漏水樓,手尾都好長。不過問題就在於香港同高雄嘅樓市都有幾大分別, 香港嘅建築商來來去去都係個幾間, 好似新鴻基，恒隆，新世界等等，但係因為高雄起樓嘅種類比較多,有十幾廿層高嘅住宅,亦都有三幾層高嘅別墅,建築商都唔一樣,好難講話邊間好邊間唔好。另外亦都有啲發展商曾經風光一時,周圍起樓,但係個樓市有起有跌,一時捱唔住,執咗笠，嗰啲就真係投訴無門啦。

其實每一個發展商有佢哋自己嘅專長,有啲起豪宅,有啲起比較平實嘅住宅, 有啲專注係一區，有啲就周圍插旗,區區都有佢份, 但係如果要摸清每一個發展商嘅來龍去脈，都咪話唔頭痛。

有見及此,我將會介紹高雄比較上出名嘅發展商,並盡量用一啲香港人明白或者比較上出名嘅發展商來做比較，希望可以用最簡單嘅方法,響最短時間之內,等大家了解高雄唔同發展商嘅市場定位。



其他建議連接：

• 搞清楚實用面積、建築面積、公設、公設比
• 臺灣用”坪“，香港用”呎“，大陸用”平米“
• 臺灣住宅房地產種類
• 高雄區域介紹 - 前言

高雄區域介紹 - 鳥松區

高雄嘅鳥松區位於高雄市中心嘅東北面, 佔地大概25 km² ,比葵青區大小小，只係住咗4萬幾人,人口密度仲小過大埔同西貢,可以算係高雄比較上鄉下嘅地方。鳥松區無地鐵,又無輕軌,出入只可以靠自己揸車,又或者高雄非常之流行嘅小型電單車,香港嘅綿羊仔,交通絕對唔方便。不過為咗俾希望投資高雄嘅香港人多一個選擇,呢一個區亦都有佢嘅特別之處。

鳥松區可以講得出嘅只有三個景點,分別係澄清湖風景區,高雄圓山飯店,同埋澄清湖棒球場,除咗澄清湖附近有幾幢比較上高嘅樓之外，其他大部份都係一啲三層高左右嘅別墅住宅,環境非常清幽。請清湖棒球場係台灣職業棒球隊 義大犀牛嘅專屬比賽場地,適逢比賽嘅日子,附近都非常熱鬧。

不過最出名嘅算係高雄長庚紀念醫院，之前菲律賓事件嘅易小玲,就係係台北林口嘅長庚醫院接受治療,同高雄嘅長庚紀念醫院屬於同一間,醫療設備,醫生質素絕對一流，個主診醫生魏福全醫生都係响高雄醫學院畢業架！

呢一區最似香港嘅西貢同大埔, 雖然無海景,但係就有個澄清湖,附近嘅別墅住宅比較多,雖然話交通唔方便,但係如果自己識揸車,十分鐘就到市區,仲有梗係間長庚紀念醫院就係附近,對醫療有要求嘅投資人就最適合不過。 



其他建議連接：

• 搞清楚實用面積、建築面積、公設、公設比
• 臺灣用”坪“，香港用”呎“，大陸用”平米“
• 臺灣住宅房地產種類
• 高雄區域介紹 - 前言
• 高雄地產商 - 前言

高雄區域介紹 - 小港區

高雄嘅小港區位於高雄市中心嘅正南邊,佔地大概系45 km²左右,差唔多係半個屯門咁大,只係住咗15萬人左右,人口密度同西貢差不多。 

小港區最有代表性嘅當然係高雄小港國際機場,大家坐飛機到台灣除咗飛去台北嘅桃園國際機場,第二個選擇就係坐飛機來高雄嘅小港國際機場,顧名思義,機場就係坐落於高雄嘅小港區啦。

小港區算係高雄嘅工業重鎮，所有嘅沿海區域,都係比一啲大型嘅工廠或者船廠霸佔,貪嗰度地方容易上落貨,情況同葵涌貨櫃碼頭差不多,亦都因為屬於工廠區,空氣同環境當然不及其他純住宅區,響小港區投資真係要小心,一個唔覺意,吹一吹西南風,屋企有機會食晒工廠吹過來嘅廢氣,唔使多講,樓價唔會高得去邊。

小港區唯一可取嘅景點係享區嘅南邊,高雄有計劃興建一個遊艇停泊區,不過講咗幾年都仲未見到影,如果有興趣,自己Google一下"高雄南星計劃"就最清楚啦。

呢一區有啲似葵青區，葵涌貨櫃碼頭一帶，亦都有啲似十幾年前嘅觀塘工業區,而家望住個啟德碼頭,無敵維港海景,真係估到估唔到,高雄小港區亦都有同樣嘅潛力,不過就唔知要等幾耐啦,如果閣下有些少賭仔心態,鍾意險中求勝,又有閑錢唔等住用,咁投資小港區都可以掛。



其他建議連接：

• 搞清楚實用面積、建築面積、公設、公設比
• 臺灣用”坪“，香港用”呎“，大陸用”平米“
• 臺灣住宅房地產種類
• 高雄區域介紹 - 前言
• 高雄地產商 - 前言

高雄區域介紹 - 楠梓區

高雄嘅楠梓區坐落於高雄嘅北邊,佔地大概係26 km²左右,住咗18萬人,比香港嘅葵青區大小小,人口密度同屯門差不多，從高雄 小港機場 地鐵站上車,坐半個鐘頭地鐵就可以到達楠梓，如果坐高鐵去到高雄左營站，再轉地鐵,兩三個地鐵站就到楠梓區,交通算係唔錯。

楠梓區嘅景點唔算多,比較出名嘅有國家體育場世運主場館,亦即係高雄嘅大巨蛋，仲有高雄都會公園,有成百幾公頃大,綠草如茵,有山有水,風景優美,不過唔講你唔知,公園以前係座垃圾山,綠化之後仲做埋沼氣發電,同香港嘅將軍澳第一期堆填區一樣,亦都算係為環保出一分力,值得嘉許,不過從投資嘅角度來睇,會唔會影響樓價,你必需要自己衡量。

高雄嘅楠梓區,根本就係香港嘅屯門翻版,交通OK ,買嘢食嘢 都方便,離市中心大概半個鐘頭車程,唔算好遠,但係樓價就俾市中心平一大截,好多住係高雄嘅年青人都會係楠梓區搵一啲上車盤,貪佢平又方便,如果睇好屯門以後嘅發展,楠梓區非常適合你。



其他建議連接：

• 搞清楚實用面積、建築面積、公設、公設比
• 臺灣用”坪“，香港用”呎“，大陸用”平米“
• 臺灣住宅房地產種類
• 高雄區域介紹 - 前言
• 高雄地產商 - 前言