高雄區域介紹 - 楠梓區

高雄嘅楠梓區坐落於高雄嘅北邊,佔地大概係26 km²左右,住咗18萬人,比香港嘅葵青區大小小,人口密度同屯門差不多，從高雄 小港機場 地鐵站上車,坐半個鐘頭地鐵就可以到達楠梓，如果坐高鐵去到高雄左營站，再轉地鐵,兩三個地鐵站就到楠梓區,交通算係唔錯。

楠梓區嘅景點唔算多,比較出名嘅有國家體育場世運主場館,亦即係高雄嘅大巨蛋，仲有高雄都會公園,有成百幾公頃大,綠草如茵,有山有水,風景優美,不過唔講你唔知,公園以前係座垃圾山,綠化之後仲做埋沼氣發電,同香港嘅將軍澳第一期堆填區一樣,亦都算係為環保出一分力,值得嘉許,不過從投資嘅角度來睇,會唔會影響樓價,你必需要自己衡量。

高雄嘅楠梓區,根本就係香港嘅屯門翻版,交通OK ,買嘢食嘢 都方便,離市中心大概半個鐘頭車程,唔算好遠,但係樓價就俾市中心平一大截,好多住係高雄嘅年青人都會係楠梓區搵一啲上車盤,貪佢平又方便,如果睇好屯門以後嘅發展,楠梓區非常適合你。



其他建議連接：

• 搞清楚實用面積、建築面積、公設、公設比
• 臺灣用”坪“，香港用”呎“，大陸用”平米“
• 臺灣住宅房地產種類
• 高雄區域介紹 - 前言
• 高雄地產商 - 前言

高雄區域介紹 - 前言

好多人問我响高雄投資響邊區最好，但最好笑嘅係就算我話俾佢聽邊一區好，都好難講清楚嗰邊有咩好 ，有時候真係幾嘥氣，但諗諗下其實最好嘅方法就係用一啲香港人明白嘅區嚟表達高雄唔同地區嘅分別。譬如講, 高雄嘅楠梓區，就好似香港嘅屯門一樣，離開市中心雖然有一段距離，但起碼有地鐵到，交通都算方便，但亦都好明顯樓價會比市中心平一大截，要搵上車盤嘅話就最適合不過啦。又譬如講高雄嘅苓雅區，即係而家嘅高雄亞洲新灣區所在地，又有海景, 又有高雄嘅地標85大樓，仲有而家貴絕高雄嘅國硯豪宅坐鎮，就最似香港嘅中環不過啦，嘩咁樣一講就係香港人都明白啦！

有見及此,我將會介紹高雄每一個區分同香港各區嘅比較，並盡量用一啲香港人明白嘅詞彙嚟介紹高雄各區嘅特色，希望可以用最簡單既方法，響最短時間之內，等大家了解高雄嘅區份。



其他建議連接：

• 搞清楚實用面積、建築面積、公設、公設比
• 臺灣用”坪“，香港用”呎“，大陸用”平米“
• 臺灣住宅房地產種類
• 高雄地產商 - 前言