高雄區域介紹 - 旗津區

高雄嘅旗津區係高雄唯一嘅外島,南邊有一條過海隧道可以開車直達旗津,而北邊有一個渡輪碼頭,大家可以坐船直達,船費非常之平,又可以順便睇下高雄港嘅風景,同香港嘅天星小輪有異曲同工之妙，不過亦都同香港嘅天星小輪一樣,前後唔使五分鐘就坐完,真係囉柚都未坐暖就要落船啦。

旗津由南面到北面大概9 km，但係從東面到西面1 km都唔使，長長窄窄，有啲似香港嘅長洲。島上面無高樓大廈,只有D三四層高嘅民宿,或者其他三四層高嘅住宅,島上邊有一座新落成嘅酒店,而酒店樓下就係一條買海味嘅街,要買啲手信，乾貨，海產都幾方便。

旗津島上面嘅景點唔多,最多人識嘅就係旗津嘅廟前大街,有好多賣海鮮嘅檔口,即叫即煮,都幾有特色,食飽可以去旗後燈塔近距離 睇下啲遠洋輪船出港,又或者去旗津海岸公園附近放下紙鷂,跟住再去旗津嘅沙灘玩下高雄獨有嘅黑色沙灘,不過唔使緊張,啲沙黑色唔係因為污染,只係因為台灣屬於地震板塊嘅交界處，好多岩漿活動， 而岩漿亦都以玄武岩為主，顏色比較黑,所以沙灘裡面嘅沙以黑色為主。

老實講呢區最似香港嘅離島區,長洲,南丫島咁上下，不過因為交通亦都尚算方便,島上邊住咗足足成三萬人,以人口密度計,比灣仔更高！如果你對香港嘅離島情有獨鍾,貪嗰邊陽光與海灘,空氣又清新,與世無爭,又唔怕出去買嘢唔方便,高雄嘅旗津區就最適合你啦！



其他建議連接：

• 搞清楚實用面積、建築面積、公設、公設比
• 臺灣用”坪“，香港用”呎“，大陸用”平米“
• 臺灣住宅房地產種類
• 高雄區域介紹 - 前言
• 高雄地產商 - 前言