高雄區域介紹 - 苓雅區

高雄嘅苓雅區係新興區嘅南邊,非常之接近市中心,雖然只得8 km²左右住咗成17萬人，人口密度仲高過香港嘅中西區同灣仔 ，真係人多車多。 而成個苓雅區大部份嘅地方都係坐落於輕軌圈入邊,亦即係我講嘅高雄市中心區域。苓雅區嘅東面係傳統豪宅區,曾幾何時呢邊係高雄最貴嘅地段之一,不過隨着高雄嘅發展,貴價嘅地段慢慢移向苓雅區嘅西邊，無辦法啦,嗰邊又有海景,又有高雄嘅地標85大樓,仲有全高雄最貴嘅豪宅國硯，真係想唔貴都唔得。

啱啱講過,苓雅區最出名嘅景點有高雄85大樓,鍾意shopping嘅朋友可以去三多商圈,有齊百貨公司高雄大遠百，高雄SOGO ,新光三越高雄三多店, 真係正過銅鑼灣。 仲有如果鍾意食麵包嘅朋友,可以去全台灣唯一嘅一間吳寶春麵包屋,嘆下咩嘢叫做米之蓮星級麵包廚師整嘅麵包。

高雄市政府嘅行政中心亦都係苓雅區入邊,高雄市政府文化局亦都成日會舉辦一啲文化藝術活動比市民參與,附近又有出名嘅五福國民中學,國立高雄師範大學,四維國小,苓洲國小,成功國小等等,生活機能真係非常方便。

呢區唔使多講同香港嘅中西區非常相似,好似中環金鐘附近嘅政府合署,又有海景，又有好似銅鑼灣嘅SOGO ,買嘢食嘢都非常方便,當然樓價亦都相對地比較高,不過從投資嘅角度來講,如果你睇好香港嘅中西區,高雄嘅苓雅區近海邊嗰邊就最適合你啦！



其他建議連接：

• 搞清楚實用面積、建築面積、公設、公設比
• 臺灣用”坪“，香港用”呎“，大陸用”平米“
• 臺灣住宅房地產種類
• 高雄區域介紹 - 前言
• 高雄地產商 - 前言